04.12.1984
Sameinað þing: 28. fundur, 107. löggjafarþing.
Sjá dálk 1557 í B-deild Alþingistíðinda. (1030)
126. mál, skipun nýs útvarpsstjóra
Menntmrh. (Ragnhildur Helgadóttir):
Herra forseti. 1. liður fsp. á þskj. 130 er þessi:
„Hvaða forsendur voru lagðar til grundvallar við nýlega skipun í embætti útvarpsstjóra?“
Svarið er þetta: Að öðrum umsækjendum ólöstuðum þótti mér augljóst að Markús Örn Antonsson væri hæfastur til starfsins.
2. liður fsp. er þessi:
„Var leitað umsagnar útvarpsráðs, starfsmannafélaga Ríkisútvarpsins eða einhverra annarra aðila?“
Svarið er þetta: Formlegra umsagna var ekki leitað, enda gera lög ekki ráð fyrir því.
3. liður fsp. er þessi:
„Var rætt við alla umsækjendur og náms- og starfsferill þeirra kannaður til hlítar?“
Svarið er þetta: Það var ekki rætt við alla umsækjendur, en náms- og starfsferill þeirra var kannaður með viðhlítandi hætti.