skýrsla forsætisráðherra um efnahagsmál og aðkomu Alþjóðagjaldeyrissjóðsins.
Ég skildi spurninguna ekki alveg en reikna með því að hv. þingmaður hafi verið að spyrja mig hvort ég teldi sjávarútvegsstefnu Evrópusambandsins óæskilega fyrir íslenska hagsmuni (KÓ: Eða hvort við ættum að ganga inn?) eða hvort við ættum að ganga í það. Ég vil ekkert tjá mig um það. Mér finnst að þessi mál eigi að skoða mjög vel. Þegar við fjöllum um hag lands og þjóðar gerum við það á mjög hlutlausan hátt án þess að vera í einhverjum, hvað eigum við að segja, lokuðum, föstum hólfum. Annaðhvort er það svona eða hinsegin. Við verðum að hafa opinn huga fyrir því sem er að gerast í kringum okkur.
Ég er t.d. á þeirri skoðun, fyrst verið að tala um Evrópumál, að íslenska krónan sé ekki helgitákn og á ekki að vera slíkt. Sumir eru þannig þenkjandi að þeir telja að alls ekki megi sleppa henni eða láta hana fara. En hún er í raun og veru bara tákn fyrir ákveðin verðmæti. En umhverfið sem við erum komin inn í núna, efnahagsumhverfi og aukin samskipti við aðrar þjóðir hefur gert það að verkum að menn hafa spilað á íslensku krónuna. Veðjað með hana, keypt hana, selt hana og búið til alls konar bréf og dót í kringum hana sem hefur m.a. valdið þeirri slæmu stöðu sem við erum í umfram aðra.