tengsl Icesave við endurreisn efnahagslífsins.
Virðulegi forseti. Undanfarin missiri hefur klingt í eyrum Íslendinga að lausn Icesave-málsins tefji endurreisnina og að hún muni ekki hefjast af krafti fyrr en nauðasamningarnir við Breta og Hollendinga liggi fyrir undirritaðir. Því langar mig til að spyrja hæstv. forsætisráðherra:
Hver eru tengslin á milli þess að ekki er hægt að ráðast í skuldavanda heimilanna og Icesave?
Hver eru tengslin á milli þess að ekki er hægt að endurskipuleggja efnahagsreikning fyrirtækjanna og Icesave?
Hver eru tengslin á milli þess að ekki er hægt að ganga frá fjárfestingarsamningum, til að mynda við Verne Holdings og Norðurál, og Icesave-málsins?
Hver eru tengslin á milli Icesave og þess að erlendir fjárfestar eru nær virtir að vettugi?
Hver eru tengslin á milli þess að ríkisstjórnin stendur ekki við stöðugleikasáttmálann og Icesave?
Hver eru tengslin á milli þess að hæstv. umhverfisráðherra stendur stöðugt í vegi fyrir uppbyggingu og Icesave-málsins?
Hver eru tengslin á milli þess að hægt var að endurskipuleggja bankakerfið og Icesave?
Og að lokum: Hver skyldu vera tengslin milli þess ráðaleysis og doða sem ríkir á Íslandi nú um stundir og þess hverjir sitja í ríkisstjórn? Hver eru þau tengsl?