fríverslunarsamningur EFTA og Serbíu og landbúnaðarsamningur Íslands og Serbíu.
Frú forseti. Enn mæli ég fyrir tillögu um heimild til ríkisstjórnarinnar til að fullgilda fyrir Íslands hönd fríverslunarsamning, að þessu sinni millum EFTA og Serbíu. Hann var undirritaður í Genf 2009. Sömuleiðis leita ég heimildar til að fullgilda landbúnaðarsamning milli Íslands og Serbíu frá sama tíma.
Á undanförnum þremur árum hafa árleg verðmæti vöruútflutnings til Serbíu verið á bilinu 106–670 millj. kr. Serbía hefur reyndar orðið töluvert mikilvægur markaður fyrir afurðir úr kolmunna. Þangað flytjum við líka sælgæti og lyfjavörur. Vöruinnflutningur frá Serbíu hefur verið á bilinu frá 46–115 milljónir síðustu þrjú ár, mest hefur verið flutt inn af lyfjum. Eins og fyrri samningar kveður þessi á um lækkun eða niðurfellingu tolla á iðnaðarvörur, sjávarafurðir og unnar landbúnaðarvörur. Tollar á sjávarafurðir og allar helstu iðnaðarvörur frá Íslandi falla niður frá gildistöku samningsins eða að loknu fimm ára aðlögunartímabili.
Viðskipti með óunnar landbúnaðarvörur falla undir landbúnaðarsamninginn og kveður hann á um að tollar á tilteknar landbúnaðarvörur verði lækkaðir eða felldir niður.
Sérstaklega vil ég vekja eftirtekt á því, frú forseti, af því að hér inni eru áhugamenn um íslenskan landbúnað, að eftir samþykkt þessarar þingsályktunartillögu og þar með staðfestingu verður hægt að kaupa hangikjöt frá Íslandi tollfrjálst í lýðveldinu Serbíu. Það tel ég nokkur tíðindi fyrir þá sem þangað ferðast. Serbía mun sömuleiðis fella niður tolla á vatn og lifandi hross og tollar á íslenskt lambakjöt munu lækka um helming, eða úr 30% í 15%. Við fellum niður tolla á móti á ýmsar matjurtir og ávaxtasafa.
Ég legg svo til, frú forseti, að þegar þessari umræðu er lokið verði þessari tillögu vísað til síðari umr. og hv. utanríkismálanefndar.