fjárlög 2012.
Virðulegi forseti. Ég þakka hæstv. ráðherra fyrir hans ræðu. Ef ég skildi hann rétt þá var gert samkomulag við Alþjóðagjaldeyrissjóðinn. Undir það skrifa hæstv. forsætisráðherra, hæstv. fjármálaráðherra og hæstv. efnahags- og viðskiptaráðherra og það miðar að ákveðnu umhverfi í tengslum við Fjármálaeftirlitið. Hæstv. efnahags- og viðskiptaráðherra segir síðan að hann geti ekki lagt fram frumvarp sem við getum tekið afstöðu til vegna þess að hæstv. fjármálaráðherra standi á einhvern hátt í vegi fyrir því. Það væri ágætt ef hæstv. ráðherra útskýrði þetta betur ef þetta er ekki rétt skilið hjá mér.
Ég er hjartanlega sammála hæstv. efnahags- og viðskiptaráðherra um hve mikilvægt það er að Fjármálaeftirlitið sé sjálfstætt í störfum sínum. En í ljósi þess sem gerðist til dæmis með Byr og SpKef, sem voru í umsjón og vörslu hæstv. fjármálaráðherra, þar sem ekki var farið eftir lögum, hef ég áhyggjur og spyr hvort hæstv. efnahags- og viðskiptaráðherra hafi það ekki líka.