ráðgefandi þjóðaratkvæðagreiðsla um tillögur stjórnlagaráðs að frumvarpi til stjórnarskipunarlaga.

Frú forseti. Við munum greiða atkvæði hér um einstaka liði tillögunnar. Þá gefst tilefni til þess að ræða einstakar spurningar, en um málið í heild sinni er þetta að segja: Þingmenn Sjálfstæðisflokksins hafa óskað eftir því, allt frá því að stjórnlagaráð skilaði af sér tillögum sínum, að málið yrði rætt efnislega á Alþingi. Það er það sama og formaður stjórnlagaráðsins óskaði eftir að þingið gerði, að við tækjum umræðu hér á þinginu. Ég hef verið þeirrar skoðunar að tillögur stjórnlagaráðs væru ágætisinnlegg í þá vinnu sem bíður þingsins en meiri hlutinn hefur hagað málum þannig hér á þinginu þennan vetur sem liðinn er að nær heilt ár er liðið án þess að nokkuð markvert hafi gerst. Nú á að fara að efna til þjóðaratkvæðagreiðslu 20. október á þessu ári þannig að rúmt ár mun líða frá því að stjórnlagaráð (Gripið fram í.) lauk störfum, ráðið sem meiri hlutinn kaus sér og var ekki kosið af fólkinu í landinu heldur af meiri hluta þingsins, þar til þingið er komið með einhverja niðurstöðu í hendurnar og getur farið að vinna að málinu. (Forseti hringir.) Þetta er að gerast á ábyrgð meiri hlutans. Það var ykkar val að taka málið ekki til efnislegrar umræðu á þinginu og vinna með málið. Við erum tilbúin til þess.