samþykkt rammasamnings milli ríkisstjórnar Íslands og framkvæmdastjórnar Evrópusambandsins.
Frú forseti. Ég vil árétta þetta enn frekar því að ég sem ráðherra kynnti þessi mál mjög rækilega. Það sem mér líkar svo illa í þessu er laumuspilið. Hvers vegna getum við bara ekki tekist á um hvort þiggja eigi mútufé frá Evrópusambandinu til að aðlaga íslenska stjórnsýslu og búa okkur undir aðild? Um það snýst þetta. Þetta er fé sem Evrópusambandið býður og í raun krefst þess hálfvegis að við tökum við því til að aðlaga íslenska stjórnsýslu að Evrópusambandinu.
Þetta kemur líka skýrt fram í skýrslu utanríkisráðherra sem við ræddum fyrr í vor en þar segir, með leyfi forseta:
„Landsáætlanir fyrir árið 2012 og 2013“ — þ.e. forsendur fyrir IPA-styrkina — „eru í undirbúningi. Á árinu 2012 verður áhersla lögð á undirbúning fyrir þátttöku í stoðkerfissjóðum og á árinu 2013 á uppbyggingu stofnana.“
(Forseti hringir.) Hvað er það annað en hrein og klár aðlögun? Það er enda eðlileg krafa Evrópusambandsins en líka enn þá eðlilegra að við höfnum þessu.