samningur milli Íslands og Færeyja um fiskveiðar innan íslenskrar og færeyskrar lögsögu 2014.
Frú forseti. Þessi framsaga var miklu tærari en um hið fyrra mál sem hæstv. ráðherra flutti. Þó liggur eitt lykilatriði eftir, sem er óljóst í mínum huga, og það varðar loðnuna. Það er eins og hæstv ráðherra sagði að sönnu kveðið á um að færeyskum skipum sé á loðnuvertíðinni heimilt að veiða þessar 10 þús. lestir innan íslenskrar lögsögu sem Færeyingar eiga samkvæmt gagnkvæmum samningi við grænlensk stjórnvöld. En það segir líka í greinargerð að samningur sé óbreyttur frá fyrri árum að öðru leyti en því að ekki sé kveðið á um heimildir færeyskra skipa til loðnuveiða í íslenskri lögsögu á vertíðinni og er tekið fram að ákvörðun þar að lútandi verði tekin á fundi aðila síðar á árinu 2014. Svo segir einhvers staðar, ég held í samningnum sjálfum, að sá fundur skuli vera ekki síðar en í desember á þessu ári.
Ég spyr með mikilli virðingu: Hvað þýðir þetta? Hvað er það sem þá á að ræða? Og svo að ég sé aðeins tærari í því hvað ég er að fara: Hvað varð um þær 30 þús. lesta af loðnu sem Íslendingar hafa jafnan leyft Færeyingum að veiða allt frá því að þeir lentu í efnahagshruni sjálfir upp úr 1990 og þriðjungur íbúanna flutti á brott? Allar götur síðan, muni ég rétt, hefur verið í gildi ákvæði um það að þeir fengju 30 þús. tonn svo fremi sem heildaraflamark væri 500 þús. tonn, ella 5% af aflaheimildum. Er það þetta sem á að ræða um í desember eða er verið að opna á að taka eigi þessar veiðiheimildir af Færeyingum?