verslun með áfengi og tóbak o.fl.

Virðulegi forseti. Ég vil alls ekki gera lítið úr þeirri vá sem fylgir áfengissýki og ég geri mér grein fyrir því að drykkjusýki hefur verið þjóðarsjúkdómur á Íslandi og að ekki er til sú fjölskylda hér á landi sem ekki hefur haft kynni af þeim sjúkdómi. Mig langar að inna hv. þingmann aðeins betur eftir því hvort hann telji það virkilega svo að hér fyrr á árum, áður en bjór kom til sögunnar og aukin neysla á léttvínum, að sú ofsadrykkja sem tíðkaðist um helgar, þegar menn drukku frá sér ráð og rænu og leiddu stórkostlegar hörmungar yfir sjálfa sig og fjölskyldur sínar með ofsadrykkju — hvort hann telji virkilega að það almenna ástand í (Forseti hringir.) drykkjumenningu hafi verið æskilegra og betra en sú drykkja sem þó tíðkast (Forseti hringir.) nú til dags með öllum þeim vandamálum, vissulega, sem henni fylgja.