brottvísun umsækjenda um alþjóðlega vernd.

Virðulegi forseti. Ég vil þakka hv. þingmanni fyrir að taka þetta mál hér upp undir þessum lið. Ég held að mörg okkar séu slegin m.a. yfir meðferðinni á fötluðum manni sem var fluttur nauðugur á götuna í Grikklandi tveimur vikum áður en taka átti málið hans fyrir í héraðsdómi. Ég vil nota tækifærið hér til að vekja athygli þingheims á því að dómarinn í málinu við Héraðsdóm Reykjavíkur hefur beint því sérstaklega til ríkislögmanns að kanna fyrir næsta þinghald, á morgun, hvort vilji sé til þess af hálfu íslenska ríkisins, af hálfu stjórnvalda að gera ráðstafanir til þess að tryggja að maðurinn, sem nú er á götunni í Grikklandi, geti komið fyrir dóm og gefið skýrslu milliliðalaust. Þetta er það sem dómarinn í málinu er að kalla eftir, ég vil vekja athygli þingheims á því, og eflaust er þetta talið mikilvægt svo að rétturinn til aðgangs að dómstólum sé að fullu virtur í þessu tiltekna máli og málsmeðferðin gangi eðlilega fyrir sig. Á morgun munum við fá að vita hver afstaða íslenska ríkisins er í þessum efnum.