hækkun vaxta og hagræðingaraðgerðir.
Virðulegi forseti. Verðbólgan annars staðar er að lækka og við sjáum það líka, af því að hér er verið að nefna skuldasöfnun, að við erum enn með hæstu vaxtagjöldin í Evrópu. Gleymum því ekki. Hæstv. forsætisráðherra svarar ekki því hvaða hagræðingaraðgerðum við megum vænta núna á næstu dögum. En við skulum líka hafa það hugfast að matarkarfan er einn stærsti útgjaldaliður heimila í landinu, einn stærsti útgjaldaliðurinn, og fólk er á sama tíma að kljást við það hvernig það á að borga af óverðtryggðu lánunum sínum, hvort það eigi að fara yfir í verðtryggð lán af því að það getur ekki farið í aðra gjaldmiðla eins og fyrirtækin, mörg hver. Hjá þessum hópi er matarkarfan að hækka rosalega í verði og ríkisstjórnin á stóran þátt í því, annars vegar með agaleysi í ríkisfjármálum og kyndir þannig undir verðbólguna en líka hinu, að ríghalda í kerfi, ríghalda í ákvarðanir sem gætu m.a. hjálpað til með að lækka verðið á matarkörfunni. Hæstu liðirnir í matarkörfunni sem eru að hreyfast upp á við eru þeir sem lúta að einokun á markaði. (Forseti hringir.) Það eru þeir sem eru undanþegnir samkeppni á markaði hér á Íslandi þannig að ríkisstjórnin getur auðvitað gert fullt. Ég óska eftir því að hæstv. forsætisráðherra komi hingað upp og segi okkur hvaða (Forseti hringir.) hagræðingaraðgerðum við megum búast við á næstunni til þess að ná einhverjum tökum á verðbólgunni. Þeirra er ábyrgðin.