kosning í fastanefndir skv. 13. gr. þingskapa.
Hæstv. forseti. Ég tel að hér sé óeðlilega að verki staðið og það geti ekki samræmst þingsköpum, þeim reglum sem Alþingi starfar eftir. Ég held að það sé best að ég fari fram á það við forseta að haldinn verði fundur í sjávarútvegsnefnd þingsins á mánudag til að ræða stöðuna sem uppi er í byggðum landsins.
Ég vænti þess að hæstv. forseti muni verða við þeirri bón minni. Hún er sjálfsögð og eðlileg en það sýnir í hnotskurn í hvaða fúafen er verið að fara með þá tillögu sem hér er lögð til, ef nefndir eru ekki til sem eiga að fjalla um mál sem við eigum rétt á að fjalla um. Þessari ósk minni er hér með komið á framfæri.
Ég vænti þess að hæstv. forseti leysi úr henni eftir þingsköpum.