Opinber stuðningur við tæknirannsóknir, nýsköpun og atvinnuþróun.
Hæstv. forseti. Þetta snýst að mínu viti alls ekki um stærð stofnunarinnar. Þetta snýst um trúverðugleika stjórnsýslunnar og hvernig þeim fjármunum skuli komið til skila sem tekin er ákvörðun um á Alþingi að renni til byggðamála. Þá er nauðsynlegt að það sé alveg skýrt hvað fari til byggðamála og hvað fari í aðra starfsemi. Ég get ekki betur séð en að þessari stofnun sé fyrst og fremst ætlað annað hlutverk en byggðahlutverkið. Ég hef ekkert á móti því, ég sagði það í umræðunni, mér finnst sú hugsun ágæt í frumvarpinu sem liggur fyrir um sameiningu þessara stofnana, en byggðahlutverkið verður greinilega mjög óljóst þarna og hætta er á að það geti orðið til þess að tortryggni vakni gagnvart annarri starfsemi sem þarna á í hlut. Ég tel að huga þurfi mjög vel að því í nefndarstarfinu.