heilbrigðisstefna til ársins 2030.
Hæstv. forseti. Ég er nokkuð sammála hv. þm. Ólafi Þór Gunnarssyni. Það er þessi ábyrgðarhluti sem er mjög mikilvægur og það sem mætti, ég vil ekki segja laga, það þarf kannski að hnykkja betur á því.
Nú erum við að tala um þennan hatt yfir ákveðinni stefnu. Þar undir fellur ábyrgð starfsfólks. Það sem ég er aðallega að tala um er að gera þurfi skýran greinarmun á því hvort um er að ræða stjórnendur eða hvort um er að ræða starfsfólk. Við höfum heyrt sögur af því að starfsfólk vilji ekki ráða sig til starfa á vissar stofnanir af því að það er ekki nægilega skýrt, eins og það er í dag, hvernig farið verði með mál komi eitthvað upp á. Það er því mjög mikilvægt, og kannski er það leiðin, að skýra þetta betur í þeim lögum sem hv. þingmaður nefndi. En í mínum huga þarf þetta að vera skýrt aðgreint að stjórnendur hljóta að þurfa að bera ábyrgð á þeirri stofnun sem þeir stjórna. Starfsfólkið gerir sitt, en stjórnendur verða að hafa þessa aðalábyrgð.