staða sparifjáreigenda.
Frú forseti. Ég þakka hæstv. ráðherra fyrir þau svör sem hann þó veitti við nokkrum spurningum. Hann svaraði engu um ríkisábyrgðina. Hann svaraði engu um það hvernig skattarnir hafa verkað á sparifjáreigendur. En hann gat þess, sem er rétt, að til að skapa atvinnu þarf annaðhvort áhættufé, þ.e. hlutafé, eða lánsfé, þ.e. sparnað. Ríkisstjórnin er að ráðast á hvort tveggja með stórhækkun skatta á fjármagn og hagnað fyrirtækja. Með tryggingagjaldi er hún enn fremur að ráðast á atvinnusköpun í landinu. Hún er kerfisbundið, hvort sem það er meðvitað eða ekki, kannski veit hún ekkert af því, að vinna gegn sköpun atvinnu í landinu. Hún er kerfisbundið að vinna að atvinnuleysi með því að skattleggja í auknum mæli bæði áhættufé og sparifé. Hún hefur engan áhuga á því þó að vextir í bönkunum séu neikvæðir. Hún stóreykur skattlagningu á neikvæðar tekjur.