skýrsla rannsóknarnefndar Alþingis um aðdraganda og orsakir erfiðleika og falls sparisjóðanna.
Hæstv. forseti. Ég vil nota þær fáu sekúndur sem ég hef hér til ráðstöfunar til þess að þakka fyrir umræðuna og leggja áherslu á að skýrslan sem við höfum nú haft til umfjöllunar er að mínum dómi vitnisburður um vilja Alþingis til að horfast í augu við orsakir og afleiðingar banka- og fjármálahrunsins sem hér dundi yfir árið 2008. Skýrslan sem við höfum til umfjöllunar hefur sína kosti og sína galla. Bent hefur verið á ýmsa galla á skýrslunni. Á ýmsum þáttum hefði mátt taka skýrar og fastar. Menn hafa nefnt Dróma sem dæmi þar um. Ég kom inn á slíkt í upphafsræðu minni.
Á hinn bóginn hef ég trú á því að þessi skýrsla geti orðið góður grunnur að því framtíðarstarfi sem nú þarf að ráðast í. Það varðar framtíðarskipan fjármálakerfisins í landinu. Ég vil taka undir með þeim sem þar hafa lagt áherslu á að við þurfum sérstaklega að skoða hin samfélagslegu gildi sem sparisjóðakerfið var upphaflega reist á. Menn hafa í því efni talað um samfélagsbanka. Fram kom í þingsályktun Alþingis sem hratt þessu máli öllu af stað að Alþingi bæri að ráðast í slíka vinnu. Stjórnskipunar- og eftirlitsnefnd Alþingis tekur undir það. Ég vil ítreka að hin sögulega úttekt sem er að finna í skýrslu rannsóknarnefndarinnar um sparisjóðina ætti að geta komið vel þar að gagni. Ég vil skilja við málið með því að leggja áherslu á að á því þingi sem senn tekur til starfa að afloknum kosningum, verði ráðist í þá vinnu.
Enn vil ég segja hitt að það er mikilvægt, og það ætti að vera okkur lærdómur líka, að þegar við tökumst á við erfiðleika af því tagi sem við höfum gengið í gegnum gerum við það með þeim hætti sem við erum að læra að gera. Við ráðumst í vandaðar rannsóknir, reynum að hverfa frá hvers kyns dylgjunálgun, við reynum að taka málefnalega á málunum, það höfum við reynt að gera í þessari vinnu. Sitthvað má gagnrýna, eins og ég gat um áðan, en ég tel engu að síður að við séum að feta okkur áfram inn í betri eða skárri framtíð en við höfum búið við í þessum efnum.