almannatryggingar o.fl.
Hæstv. forseti. Ég kem hér upp til að þakka fyrir góða umræðu um þetta mikilvæga mál. Hér er um að ræða stærstu skref sem stigin hafa verið til bóta í almannatryggingakerfinu í áratugi. 5,3 milljarðar fara í kerfisbreytingar fyrir aldraða, einföldun á kerfinu til að minnka skerðingarnar sem voru króna á móti krónu, þeim er hætt. 4,5 milljarðar fara í frítekjumark á allar tekjur til aldraðra. 1 milljarður fer í að hækka bætur þeirra sem lægstu kjörin hafa, einstæðinga sem eru öryrkjar og aldraðir. Þetta eru alls 10,8 milljarðar og mikil einföldun á kerfinu sem snýr að öldruðum.
Nú eru viðræður á milli Öryrkjabandalagsins og velferðarráðuneytisins um mikilvægar kerfisbreytingar til handa öryrkjum. Ég vona svo sannarlega að þær umræður gangi hratt og vel fyrir sig svo að öryrkjar fái kerfisbreytingar á sínum málaflokkum eins og aldraðir. Það er mikilvægt. Ég veit að unnið er hörðum höndum að því að klára það. Þar undir liggja um 4 milljarðar í kerfisbreytingar til hagsbóta fyrir öryrkja. En auðvitað er mikilvægt í allri þeirri umræðu að huga að öryggisneti í kerfinu.
En ég kom hér eingöngu upp til þess að þakka fyrir umræðuna og minna á að það er mikill vilji til að koma til móts við þá sem höllum fæti standa. Ég þarf að kalla frumvarpið til hv. velferðarnefndar á milli 2. og 3. umr.