áætlun um gjaldeyristekjur vegna Icesave.
Frú forseti. Ég spyr hæstv. fjármálaráðherra hvort hann eða ráðuneyti hans hafi gert áætlun um hvernig Íslendingar geti skapað nægar gjaldeyristekjur næstu 15 árin til að standa undir því Icesave-samkomulagi sem hann talar fyrir því að nú er ljóst að aldrei í gegnum tíðina hefur á Íslandi skapast nægur afgangsgjaldeyrir til að komast nálægt því að standa undir því sem lagt er upp með, jafnvel miðað við bjartsýnustu áætlanir ríkisstjórnarinnar. Jafnvel þó að áætlunin um 27% endurheimtur standist hefur aldrei verið nægur gjaldeyrir til á Íslandi til að standa undir því sem þá þurfti að borga og það er einmitt sú gildra sem svo mörg þriðja heims ríki lentu í, sérstaklega upp úr 1970 í olíukreppunni þegar þau tóku lán í erlendri mynt sem síðan er búið að festa þessi lönd í fátæktargildru. Það var reyndar, eins og í samningnum sem hæstv. ráðherra hefur talað um, hægt að semja aftur þegar kom í ljós að menn stóðu ekki undir þessu. En skuldir voru ekki felldar niður. Skuldir af ríki eru ekki felldar niður. Það er bara lengt í lánunum, lengt í hengingarólinni, eins og ríkisstjórnin þekkir svo vel. Hefur ráðherrann gert ráðstafanir, kannað hvernig við getum mögulega staðið undir þessu? Það er allt annað fyrir ríkið að skuldsetja sig í erlendri mynt en sinni eigin mynt. Það er talað um hagvöxt í þessu sambandi og því er spáð að hér verði svo og svo mikill hagvöxtur en það hefur ekkert með þetta að gera.
Í Austur-Þýskalandi á sínum tíma höfðu menn alltaf nægan hagvöxt en það var skortur á erlendri mynt sem felldi það ríki að lokum og raunar var staðan þannig 1989 að þjóðarframleiðslan þar var um 250 milljarðar í vestur-þýskum mörkum [Hlátur í þingsal.] en þeir skulduðu … (Gripið fram í.) — Þetta þykir Samfylkingunni fyndið, að setja Ísland í hóp með þriðja heims ríkjum og austantjaldsríkjum. Það er nefnilega svo að staða Íslands verður að sjö árum liðnum, jafnvel þótt áform ríkisstjórnarinnar gangi eftir, verri en staða Austur-Þýskalands hvað varðar möguleika á að skapa gjaldeyri. Hvernig ætlið þið að leysa það?