framtíð íslenskrar peningastefnu, munnleg skýrsla forsætisráðherra.
Herra forseti. Ég þakka hv. þingmanni fyrir ræðu hennar. Þar kom fram sú skýra afstaða hv. þingmanns og væntanlega flokks hennar að Samfylkingin hafni myntráðsleiðinni, sem ég gerði að umtalsefni í ræðu minni. Ég er sammála hv. þingmanni um það.
Mig langar hins vegar að spyrja hv. þingmann vegna orða hennar um að hún telji það bestu leiðina fyrir Ísland — hún sagði að kreppunni hefði ekki verið velt yfir á almenning á evrusvæðinu, en ég veit ekki hvort almenningur í Grikklandi er t.d. sammála hv. þingmanni um það, hann var mjög ósáttur við hagstjórn Evrópusambandsins í gegnum þá kreppu — hvort hún sé ekki samt sammála því að taka þurfi á hagstjórnarvandanum á evrusvæðinu, að breyta þurfi utanumhaldi evrunnar. Og eigi evran að lifa af, hvort það sé ekki augljóst — og ég vitnaði áðan í Thomas Piketty — að samræma þurfi (Forseti hringir.) ekki aðeins peningastefnuna heldur einnig stefnu í ríkisfjármálum og skattamálum á evrusvæðinu.