fjárlög 2016.
Herra forseti. Ég þakka hæstv. ráðherra fyrir svarið. Vissulega gat það kannski orðið flókið en eins og ég man þetta voru ferðaþjónustuaðilar algerlega búnir að gera ráð fyrir þessu í verðskrám sínum fyrir árið, þannig að þegar það var dregið til baka þá held ég að þeir hafi verið þeir einu sem græddu á þessu. En auðvitað gat þetta orðið flókið og annað þar fram eftir götunum. Náttúrupassinn var kannski ekki heldur alveg það auðveldasta sem átti að fara í gang á Íslandi miðað við þá umræðu og hvernig það var útfært, enda dó hann drottni sínum. Ég tek alveg mark á svörum ráðherrans en ég er ekki sammála henni. Ég held að ríkisstjórninni hefði verið í lófa lagið að láta þessa hækkun ganga eftir og eyrnamerkja hana ferðaþjónustunni enda kannski ekki vanþörf á að bæta í þar.
Ég held, við getum verið ósammála um það, að þetta hafi verið mistök og ríkissjóður, og sérstaklega ferðamannaiðnaðurinn, hefði aldeilis þurft á þeim peningum að halda. Við sjáum hvernig ástandið er í dag.