kosningar til sveitarstjórna.
Virðulegi forseti. Ég þakka kærlega fyrir þessa spurningu frá hv. þingmanni vegna þess að þetta er einmitt líka einn kjarni málsins. Því miður falla fatlaðir og hreyfihamlaðir einstaklingar alltaf á milli þilja. Þegar ég horfði á þessar fimm frambærilegu stúlkur með umboðsmanni barna á vegum UNICEF í þinghúsinu var fyrsta hugsunin mín: Hvar eru drengirnir, hvar eru fötluðu einstaklingarnir eða þeir hreyfihömluðu? Mér fannst eiginlega sorglegt þegar í ljós kom að það var enginn. Ég veit ekki hvort það var fullreynt að fá þessa einstaklinga þarna inn.
Það er líka annað í þessu, við erum að tala um fatlaða einstaklinga sem eru kannski 16, 17 og 18 ára og, hugsið ykkur, við erum að segja að þeir megi kjósa en á sama tíma eru þessir fötluðu einstaklingar á vinnumarkaði, hafa kannski fæðst með sína fötlun, og þá geta þau ekki farið að vinna vegna þess að ef þau eru með einhverja vinnu kemur króna á móti krónu skerðing. Það koma alls konar skerðingar sem við erum enn með inni til að valda fötluðum einstaklingum erfiðleikum.
Við setjum það ekki í forgang á þingi að taka þessar hindranir í burtu, að þau geti unnið án skerðingar og framfleytt sér sómasamlega. Nei, nei, látum þau kjósa í sveitarstjórnarkosningum. Það bætir allt.