samþykkt rammasamnings milli ríkisstjórnar Íslands og framkvæmdastjórnar Evrópusambandsins.
Frú forseti. Ég efast einhvern veginn um að hv. þingmaður hafi komið beint fram þegar hann svaraði spurningu minni um það hvernig fólki liði á þingflokksfundum hjá Vinstri grænum, alla vega ekki á fundinum í gær, að menn séu þar sprækir og kátir og glaðir. (JBjarn: Vígreifir eins og ég.) Vígreifir, já. Ég hugsa að margir séu bardagaþreyttir. (JBjarn: Ekki aldeilis.) Nei, ekki aldeilis. Jæja, þá vitum við það, líka þeir sem eru orðnir bardagaþreyttir.
Hann sagði: Við viljum ganga inn í Evrópusambandið á okkar forsendum. Það hefur aldrei nokkurn tíma staðið til. Evrópusambandið fer ekkert að breyta sínum reglum fyrir litla þjóð norður í hafi, það stendur ekki til, þannig að við förum aldrei inn í Evrópusambandið á okkar forsendum. Við förum alltaf inn í Evrópusambandið á þeirra forsendum en það getur vel verið að við getum sveigt það pínulítið til tímabundið þannig að það nálgist okkur en við munum aldrei fara inn á okkar forsendum.