rammasamkomulag milli Grænlands/Danmerkur, Íslands og Noregs um verndun loðnustofnsins og stjórnun veiða úr honum.
Hæstv. forseti. Ég lýsi yfir ánægju minni með þetta mál vegna þess að þarna tökum við höndum saman með þjóðunum í kringum okkur um nýtingu loðnu og eftirlit með loðnustofninum. Mér datt í hug þegar ég var að lesa þetta mál að við höfum haft áhyggjur af loðnugöngu undanfarin ár, breyttu göngumynstri og öðru slíku, og hefur mikið verið talað um loftslagsmálin í því sambandi. Þegar ég var á loðnuvertíð fyrir 30 árum var þar um borð maður sem hafði verið á loðnu frá því að veiðar hófust. Hann sagðist aldrei hafa séð það að loðnan hagaði sér eins á milli ára. Mig langar til að segja þetta hérna núna vegna þess að það er aldrei fyrir fram séð hvernig fiskurinn í sjónum hagar sér. Hann hefur bæði sporð og ugga. [Hlátur í þingsal.]