fjárlög 2016.
Forseti. Ég treysti því að forseti noti nú hina víðfrægu bjöllu Alþingis til að vekja hina ráðherrana af sínum sæta svefni. Mér finnst aðallega brýnt fyrir mína parta að fá hér í hús hæstv. menntamálaráðherra. Ég er með ræðu á eftir einum þingmanni og ætla að fjalla sérstaklega um stöðuna hjá Ríkisútvarpinu og ég bara fer fram á það og krefst þess að hæstv. ráðherra mæti hér í hús og svari fyrir þá stöðu sem upp er komin með RÚV.
Ég hef heyrt það í dag að ekki standi til að afgreiða frumvarp frá ráðherranum. Ég vil bara fá að heyra það beint frá hæstv. ráðherra og ég fer fram á það að hann komi hingað. Ég er hreinlega tilbúin að standa hér undir bjölluhljóm þangað til ráðherra kemur í hús og ætla bara ekkert að færa mig.
(Forseti (ÞorS): Forseti leggur til við þingmanninn að hann yfirgefi ræðustólinn þar sem ræðutíma hans er lokið.)
Ég vil fá svör, hæstv. forseti. Kemur hæstv. ráðherra í hús og hvenær stendur til að ljúka þessum þingfundi? Ég fer ekkert fyrr en ég fæ svör.
(Forseti (ÞorS): Forseti leggur fyrir þingmanninn að yfirgefa ræðustólinn.)
Ég fer fram á það að forseti svari spurningum þingmanna nú þegar og sýni þinginu og þingmönnum virðingu.
(Forseti (ÞorS): Þegar þeir þingmenn sem hafa kvatt sér hljóðs undir þessum lið hafa talað mun forseti svara þeim spurningum sem til hans hefur verið beint.)
Það er gott að vita.