greinargerð um jafnréttisáætlun.
Hæstv. forseti. Hv. þm. Kolbrún Halldórsdóttir hefur beint til mín fyrirspurn er varðar greinargerð um jafnréttisáætlun og ég þakka henni fyrir þá spurningu. Ég get með ánægju upplýst að nú liggja fyrir í ráðuneytinu drög að ítarlegri skýrslu um stöðu og þróun í jafnréttismálum frá árinu 2004. Vinna við frágang skýrslunnar er á lokastigi en fjölmargir aðilar hafa lagt hönd á plóginn við undirbúning hennar. Ég get upplýst hv. þingmann um að ég er þegar með drög að þeirri skýrslu í mínum höndum. Samhliða því að greinargerðin verður lögð fram verður lögð fram endurskoðuð þingsályktunartillaga um framkvæmdaáætlun í jafnréttismálum.
Ég vil jafnframt geta þess að nefnd er að störfum sem vinnur að endurskoðun laga nr. 96/2000, um jafna stöðu og jafnan rétt kvenna og karla. Í nefndinni eiga sæti fulltrúar allra þingflokka á Alþingi auk fulltrúa frá Jafnréttisstofu en formaður nefndarinnar er Guðrún Erlendsdóttir, fyrrverandi hæstaréttardómari. Gert er ráð fyrir að nefndin ljúki störfum í febrúar næstkomandi og er því ljóst að jafnréttismálin verða mjög fyrirferðarmikil í starfi ráðuneytisins á næstu vikum og væntanlega á vettvangi Alþingis á vorþingi og að sjálfsögðu er það vel.
Hvað greinargerðina varðar sem hv. þingmaður spyr um stefni ég að því að leggja hana fram á Alþingi á allra næstu vikum og þá mun gefast góður tími til að ræða þennan mikilvæga málaflokk á Alþingi.