breyting á ýmsum lögum vegna fjárlaga 2021.
Herra forseti. Það er rétt að ríkisstjórnin hefur gripið til ýmissa aðgerða vegna þeirra efnahagsþrenginga, svo að vægt sé til orða tekið, sem samfélagið er að takast á við núna. Sumar þeirra aðgerða hafa snúið að sköttum, það er alveg rétt, til að mynda framlenging á verkefninu sem kallað er Allir vinna. Það er mjög jákvætt verkefni en sýnir einmitt, og hefur sýnt í gegnum tíðina, kosti þess að draga úr álögum til að auka atvinnu- og verðmætasköpun. Það að ríkið skuli hafa gripið til þessara aðgerða, fyrst eftir bankahrunið og svo aftur núna, sannaði í raun kenningar, sem ég held að við hæstv. ráðherra séum sammála um, um hvetjandi áhrif þess að menn fái að halda eftir meiru af verðmætasköpuninni og að það geti jafnvel á endanum skilað sér betur til ríkisins.
Þess heldur skyldi maður ætla að þetta skilaði sér núna í breytingum á skattkerfinu. Annars vegar er um að ræða viðbrögð við ástandinu, og má segja að neyðin hafi kennt ríkisstjórninni að lækka skatta, en maður hefði viljað að það skilaði sér í auknum mæli inn í framtíðarstefnu í skattamálum.
Hvað varðar tekjuskattinn, sem hæstv. ráðherra nefndi, er það jákvætt skref að nokkru leyti en mér fannst ríkisstjórnin fara reyndar mikla fjallabaksleið í þeim efnum þegar ráðist var í að koma aftur á þriggja þrepa skattkerfi rétt eftir að búið var að einfalda kerfið og fækka þrepunum niður í tvö til að ná svo ákveðinni lækkun á tilteknu tekjubili. En aðalskilaboðin eru þessi: Aðgerðir sem gripið er til í neyð — það hefur sýnt sig að nokkru leyti að slíkar aðgerðir eiga heima til framtíðar.