uppgjör á eignum Landsbankans og Icesave.
Virðulegi forseti. Þau tíðindi hafa nú spurst út að búið sé að finna leið til að endurreisa Landsbankann og því ber að fagna að búið sé að koma á samkomulagi milli kröfuhafanna og íslenskra stjórnvalda, gamla og nýja bankans og skilanefndarinnar um hvernig uppgjör eigna muni eiga sér stað. Á sama tíma spyrjast út fregnir af nýju mati á virði eignasafns Landsbankans sem hefur tengingu við Icesave-málið og þá umræðu sem hér er í vændum á þinginu um stöðu þess máls. Mig langar til að bera undir fjármálaráðherra þrjár spurningar:
1. Er ríkisstjórnin með það í huga að leiða til lykta viðræður við Breta og Hollendinga vegna Icesave án þess að haft verði samráð um mögulega útfærslu við þingið? Nú er ríkisstjórnin í fyrsta lagi búin að gera samning við Breta og Hollendinga sem hún gat ekki fengið samþykktan á þinginu. Síðan gerðu stjórnarflokkarnir breytingar á ríkisábyrgðinni sem ekki fékkst samþykkt af Bretum og Hollendingum. Við viljum ekki fara þriðja rúntinn í þessu ósamkomulagi í Icesave-málinu sem setur málið enn og aftur í uppnám. Færi ekki betur á því að áætlanir stjórnvalda um lok Icesave-málsins í samstarfi við Breta og Hollendinga yrðu kunngerðar þótt ekki væri nema fyrir utanríkismálanefnd á þinginu?
2. Telur hæstv. ráðherra að nýtt virðismat á eignum Landsbankans hafi einhverja þýðingu fyrir skuldbindingar ríkisins vegna Icesave-málsins? Hvaða þýðingu hefur það fyrir þær skuldbindingar sem verið hafa til umfjöllunar að nú meti menn það svo að 90% fáist upp í Icesave-skuldirnar? Í mínum huga er það ljóst að meginhluti skuldbindingar ríkisins liggur í vaxtabyrðinni. (Forseti hringir.)
3. Þá vil ég spyrja ráðherrann að því hvernig standi á því að skuldbinding Nýja Landsbankans við þann gamla er í erlendri mynt?