umsókn Íslands um aðild að Evrópusambandinu dregin til baka.
Virðulegi forseti. Af því að hv. þingmaður komst ekki að aðalefni spurningar minnar spyr ég hvers vegna ríkisstjórnin virðist vera að rífa í einhvern neyðarhemil til að koma okkur út úr þessum viðræðum sem allra fyrst með því að slíta þeim í stað þess að gera hlé. Mig langar þá bara að lesa tillögu þannig að það fari ekkert á milli mála að ég er ekkert að leika mér með eitthvert orðalag, þetta er bara svona.
Í stjórnarsáttmálanum segir, með leyfi forseta:
„Gert verður hlé á aðildarviðræðum Íslands við Evrópusambandið og úttekt gerð á stöðu viðræðnanna og þróun mála innan sambandsins. Úttektin verður lögð fyrir Alþingi til umfjöllunar og kynnt fyrir þjóðinni. Ekki verður haldið lengra í aðildarviðræðum við Evrópusambandið nema að undangenginni þjóðaratkvæðagreiðslu.“
Í tillögugreininni segir, með leyfi forseta:
„Alþingi ályktar að fela ríkisstjórninni að draga til baka umsókn Íslands um aðild að Evrópusambandinu. Jafnframt ályktar Alþingi að ekki skuli sótt um aðild að Evrópusambandinu á nýjan leik án þess að fyrst fari fram þjóðaratkvæðagreiðsla …“
Þarna er grundvallarmunur á því sem stendur í stjórnarsáttmálanum og því sem stendur í tillögugreininni. Ég vil bara spyrja hv. þingmann, vegna þess að nú hefur þessi kynning ekki farið fram fyrir þjóðinni, (Forseti hringir.) umræðan hefur ekki átt sér stað: Hverju hefur ríkisstjórnin komist að sem við hin vitum ekki, sem veldur því að menn ganga svona mikið lengra í tillögugreininni?