aðgangur fatlaðra að rafrænum skilríkjum.
Frú forseti. Ég vil taka undir með hv. þm. Andrési Inga Jónssyni vegna þessarar gífurlegu kröfu sem alltaf er gerð um að fólk beiti kennitölum sínum við undarlegustu aðgerðir í nútímalífi. Það er eins og fólk heiti ekki lengur neinum nöfnum og það sé bara númer á blaði. Við erum nú svo heppin á Íslandi að það er voðalega auðvelt að auðkenna okkar á annan hátt. Ég t.d. eini maðurinn í heiminum sem heitir Viðar Eggertsson en ef ég ætla að segja bara nafnið mitt einhvers staðar í einhverri afgreiðslu þá er ekki tekið mark á því að ég geti verið Viðar Eggertsson, það er eins og það séu milljónir annarra sem þurfi að greina þetta frá, og ég þarf þá að segja í heyranda hljóði hátt og skilmerkilega hvað ég er gamall því kennitölur á Íslandi byggjast á því að fólk segi frá því hvað það er gamalt og helst hátt og skýrt á alls konar opinberum stöðum. Það er þessi ofnotkun á skilríkjum sem gerir mörgum erfitt fyrir (Forseti hringir.) og hvernig einblínt er á aðferðirnar frekar en að hjálpa manneskjunni til að lifa lífinu þægilega.