öryggismál í Flugstöð Leifs Eiríkssonar.

Herra forseti. Ég geri mér fulla grein fyrir því og ég tók það fram að það hefði verið heppilegra að ræða þetta við dómsmálaráðherra en það er ekki á mínu forræði að ákveða hvaða ráðherrar eru til svara. En nú er skammt í páskafrí og því taldi ég brýnt að vekja athygli á þessu máli.

Ég varð fyrir nokkrum vonbrigðum með þá fullyrðingu hæstv. samgönguráðherra að málið sé í góðum farvegi milli fjármálaráðuneytis, dómsmálaráðuneytis og embættisins syðra. Ég hef ekki sannfæringu fyrir því að svo sé og ég hef í rauninni áhyggjur af því ef hæstv. samgönguráðherra ætlar sér ekki neina sjálfstæða þátttöku eða sjálfstætt framtak í þessu sem honum ber skylda til sem ábyrgðarmanns þess að rekstur í Flugstöð Leifs Eiríkssonar gangi hnökralaust fyrir sig. Það stefnir allt í að það verði ekki þannig innan fárra mánaða og því kalla ég eftir ábyrgari stjórnsýslu en boðuð var hér áðan.