stjórn fiskveiða.
Hæstv. forseti. Ég þakka hv. þingmanni fyrir ágætisræðu sem var greinargóð. Mig langar sérstaklega að hrósa hv. þingmanni fyrir að gera tilraun til að ala hæstv. utanríkisráðherra aðeins betur upp varðandi störfin í þingsalnum. Það veitir stundum ekki af að fara aðeins yfir reglurnar. En hverjar metur hv. þingmaður afleiðingar frumvarpsins? Nú kom það fram í ræðu hv. þingmanns að það liggur ekkert fyrir um það að farið hafi verið í einhverja greiningu á því hverjar afleiðingarnar eru, ekki reynt að taka nein dæmi eða neitt slíkt. Hvað telur hv. þingmaður að muni gerast í greininni? Hvað mun gerast hjá þeim fyrirtækjum sem nú hafa verið að bíða eftir einhverju öryggi varðandi starfsemi sína og eru tilbúin að fara í ákveðnar fjárfestingar? Mikil þörf er á fjárfestingum í sjávarútveginum en hvað munu þessi fyrirtæki gera? Og hverjar telur hv. þingmaður líkurnar á því að þetta frumvarp, verði það að lögum, muni hafa þær afleiðingar að ríkisbúskapurinn muni ná betri stöðu en er í dag?