hlutafélög og einkahlutafélög.
Virðulegi forseti. Forsvarsmenn Landsbankans þurfa vitaskuld að fara eftir jafnréttislögum og verði þetta frumvarp að lögum verða þeir að fara eftir þeim lögum. Að öðru leyti lít ég svo á að það sé fyrst og fremst hlutverk Bankasýslunnar að móta með sinni eigendastefnu þau viðhorf sem Landsbankinn getur haft til hliðsjónar þegar hann mótar sína eigin stefnu í þessum málum. Vitaskuld er það alveg óásættanlegt fyrir alla ef það verður veruleg skekkja í kynjahlutföllum í þeim stjórnum sem starfa í umboði stjórnenda Landsbankans eins og reyndar stjórnenda annarra banka.
Varðandi eignarréttinn og eignarréttarákvæði stjórnarskrárinnar lít ég svo á að löggjafanum sé vitaskuld heimilt að setja nauðsynleg og málefnaleg skilyrði í lög, jafnvel þótt þau í einhverjum skilningi þrengi athafnafrelsi þegnanna ef fyrir því eru eðlilegar og málefnalegar ástæður. Mér finnst ekkert ómálefnalegt t.d. að ríki geri þá kröfu til stjórnarmanna í stórfyrirtækjum sem sitja í umboði ríkisins að þeir hafi öðlast eða aflað sér tilskilinnar menntunar eða menntunar sem nýtist vel í starfi. Ég held að það hljóti að sama skapi að vera innan ramma þess sem stjórnarskráin leyfir að setja því einhverjar skorður hvort menn mega ganga algjörlega fram hjá kynjahlutföllum í skipun í stjórnir hlutafélaga, jafnvel þótt þau séu að fullu í einkaeigu.