breytt skipan ráðuneyta í Stjórnarráði Íslands.
Frú forseti. Ég ítreka að það að vega að stjórnsýslu sjávarútvegs og landbúnaðar eins og hér er gert, með því að leggja niður ráðuneyti þessara greina og leggja það inn í önnur ráðuneyti, er í andstöðu við meginþorra þeirra sem vinna í þessum atvinnugreinum. Þetta er eins konar aðför að atvinnulífinu á landsbyggðinni.
Ég vil líka minna á að þessar aðgerðir tengjast beint umsókn okkar og aðlögun að Evrópusambandinu. (Gripið fram í.) Ef einhverjum dettur í hug að draga það í efa þá er hér glóðvolgt plagg, drög að viðbrögðum við aðlögunarkröfum Evrópusambandsins í landbúnaði, þannig að kaflinn verði opnaður. Því að eins og þingmenn muna þá vildi Evrópusambandið fá skýrari svör. Þar er einmitt á bls. 5 greint frá því að þessi sameining ráðuneytanna (Forseti hringir.) hafi þegar átt sér stað og lögð upp sem forsenda fyrir því hvernig brugðist skuli við kröfum Evrópusambandsins í aðlögun varðandi landbúnað.
Þetta er hér og mér þykir sárt (Forseti hringir.) að það séu okkar flokksmenn, jafnvel forustumenn í okkar flokki, sem gangi þarna erinda í sambandi við Evrópusambandsumsóknina þvert gegn stefnu flokksins. (Gripið fram í: Hneyksli.)