Hjörleifur Guttormsson:
Virðulegur forseti. Ég vil þakka hv. fyrirspyrjanda fyrir að leggja í það stórvirki að spyrja hæstv. menntmrh. um þessi mikilvægu mál. Staðfestir það annað með öðru hversu djarfur Framsfl. er í sambandi við þennan málaflokk. En ekki meira um það, virðulegur forseti.
Það skiptir gífurlega miklu máli efnislega hvernig á málum er haldið varðandi dreifbýlisstyrkina. Bæði varðandi upphæð þeirra, að hún sé sanngjörn og viðunandi, og eins að úthlutunarreglur séu skýrar og gagnsæar. Ég var síðast í dag að heyra dæmi um útfærslu á reglum þar sem nemanda á framhaldsskóla, Menntaskólanum við Hamrahlíð, á tónlistarbraut er synjað um dreifbýlisstyrk, reglulegum nemanda í þeim skóla. Ég á eftir að athuga hvað getur valdið slíkri afgreiðslu. Kannski vill hæstv. ráðherra segja eitthvað um það? Ég hélt að svona mismunun væri ekki heimil eftir því á hvaða spori menn væru í reglubundnu framhaldsnámi.