Frsm. utanrmn. (Geir H. Haarde):
Herra forseti. Ég mæli fyrir nál. á þskj. 1047 frá utanrmn. um till. til þál. um samþykkt á breytingum og viðbótum við I. viðauka við EES-samninginn. Nefndin hefur skilað svofelldu nál.:
,,Nefndin hefur fjallað um efni tillögunnar og fengið á sinn fund Sigríði Snævarr, Kristin F. Árnason og Martin Eyjólfsson frá utanríkisráðuneytinu. Er gert ráð fyrir því að samræmdar heilbrigðisreglur ESB í viðskiptum með dýr og dýraafurðir, sem tóku gildi 1. janúar 1997, gildi einnig á Evrópska efnahagssvæðinu. Ísland tekur einungis upp þær gerðir sem varða fisk og fiskafurðir en undanþága varðandi lifandi dýr og dýraafurðir helst óbreytt. Meginreglan verður sú að heilbrigðiseftirlit fer einungis fram á sendingarstað. Heilbrigðiseftirlit og gjaldtaka við innflutning frá ríkjum utan Evrópska efnahagssvæðisins eru samræmd og fela í sér aukið eftirlit og hærri gjaldtöku. Tillaga þessi tengist 476. máli, frumvarpi til laga um breytingu á lögum nr. 93 20. nóvember 1992, um meðferð sjávarafurða og eftirlit með framleiðslu þeirra.
Nefndin leggur til að tillagan verði samþykkt.``
Svo hljóðar nál. utanrmn. og undir það rita allir nefndarmenn.
Ég tel að hér sé um að ræða ótvírætt hagsmunamál fyrir íslenska útflytjendur á sjávarafurðum og einboðið að samþykkja þessar tillögur.