Svavar Gestsson:
Virðulegi forseti. Við erum komin langleiðina með þessa undarlegu atkvæðagreiðslu sem hér hefur staðið yfir um hríð. Og hérna vorum við t.d. að taka í einu lagi sjö lagabálka sem heyra undir þrjú ráðuneyti í einni atkvæðagreiðslu. Ég hygg að það sé fátítt að slíkt hafi gerst og það er spurning hvort ekki er of langt gengið í því að kippa málum saman eins og gerst hefur í þessari atkvæðagreiðslu. Ég vil því segja fyrir mitt leyti að ég tel að þetta þurfi ekki að skapa fordæmi hér í framtíðarstörfum Alþingis að menn afgreiði mál svona.