Egill Jónsson:
Virðulegi forseti. Í síðari ræðu sinni í gær um þetta mál komu fram í máli hæstv. landbrh. þrjár afar mikilvægar áréttingar í sambandi við þessa löggjöf og þá umræðu sem fór fram um þetta mál. Þær voru í fyrsta lagi að lögin um Framleiðsluráð landbúnaðarins yrðu endurskoðuð, í öðru lagi að eðlilegt vinnulag við skiptingu búnaðarmálasjóðsgjalds væri að búnaðarsamtökin önnuðust þá skiptingu og í þriðja lagi, og það sem mér finnst reyndar mikilvægast, að sanngjarnt væri að hlutur búnaðarsambandanna yrði bættur í þessari skiptingu.
Þrátt fyrir þessar mikilvægu áherslur sem komu fram í máli ráðherrans breyta þær auðvitað ekki efni frv. og þess vegna er ég því andvígur.