Samgönguráðherra (Halldór Blöndal):
Herra forseti. Ég held að það sé mjög gott og gagnlegt að hv. þm. hreyfir þessu máli og ég tek undir með honum að það er áreiðanlega þörf á því að vekja athygli almennings á því hvaða hætta getur skapast af slíkum tækjum. Það er t.d. svo um GSM-síma að menn vita ekki gjörla hvort þeir gætu valdið alvarlegri truflun á stjórntækjum flugvéla og þess vegna ber að hafa þá lokaða um borð í flugvélum. Ég hygg að það sé rétt að fylgja þessu máli betur eftir en gert hefur verið að því leyti að upplýsa flugfarþega og almenning um það sem hér er í húfi.