Hjörleifur Guttormsson:
Virðulegur forseti. Á síðasta þingi fyrir um það bil ári var samþykkt löggjöf um skipulags- og byggingarmál þar sem vald í þessum málum var flutt með samþykki Alþingis til sveitarfélaga.
Sú tillaga sem hér liggur fyrir gengur þvert á þá niðurstöðu varðandi þann málaflokk og felur auk þess í sér að stýring á því hugsaða stjórnsýslusvæði sem þar er gerð tillaga um verði sett að meiri hluta til undir vald fulltrúa ráðherra með setur í Reykjavík. Ég tel það óskynsamlega tilhögun en í samræmi við okkar afstöðu í þingflokki Alþb. að sitja hjá að felldri okkar frávísunartillögu greiði ég ekki atkvæði.