[prenta uppsett í dálka] 130. fundur, 122. lþ.
Rannveig Guðmundsdóttir:
Herra forseti. Í 2. tölulið 15. gr. frv. er kveðið á um viðbótarlán til einstaklinga til byggingar eða kaupa á eigin íbúðarhúsnæði. Það er það eina sem stendur eftir og getur af hálfu stjórnarmeirihlutans kallast félagsleg aðgerð, að fólk fær viðbótarlán þannig að lánið verði 90% af kaupverði. Samkvæmt frv. áttu vextir af þessum viðbótarlánum að vera breytilegir og gefið var til kynna að þar með yrðu vextir af viðbótarlánum niðurgreiddir. Ljóst er að svo verður ekki því í meðförum stjórnarmeirihlutans var ákveðið að þarna yrðu einnig almennir vextir. Þetta ákvæði er um að fólk geti fengið meira lán á almennum markaðsvöxtum og vaxtabætur. Það er það félagslega sem nú finnst fyrir láglaunafólk.
