Forsætisráðherra (Davíð Oddsson):
Herra forseti. Á mánudaginn kemur verður til umræðu skýrsla um framgang þeirra viðræðna sem er undanfari ráðstefnunnar í Kyoto sem umhvrh. mun ræða og fylgja úr hlaði og mér finnst sjálfsagt að ég taki þátt í þeim umræðum og mun auðvitað gera það. Ég hygg að ummæli mín og ummæli hæstv. utanrrh., sem birt voru í Morgunblaðinu á þriðjudag, séu mjög áþekk og þurfi ekki að koma neinum á óvart. Ég tel hins vegar sjálfsagt og eðlilegt að fara ítarlega yfir þau mál með hv. þm. á mánudaginn kemur þegar þessi mál verða til ítarlegrar umræðu. Það var ekki af neinni meinbægni af minni hálfu sem þessi afstaða var tekin.