Sighvatur Björgvinsson (andsvar):
Herra forseti. Það er nú ánægjulegt að heyra að ekki gangi hnífur á milli hæstv. félmrh. og hæstv. forsrh. enda mætti nú fyrr vera. Hins vegar sagði hæstv. félmrh. réttilega frá því sem forsrh. beindi til Alþingis í morgun. Hann beindi því sérstaklega til Alþingis að þessi tvö mál, þjóðlendufrv. og frv. hæstv. ráðherra, yrðu samferða í gegnum þingið vegna þess að nauðsynlegt væri að skoða og samræma frumvörpin innbyrðis. Það er mergurinn málsins og sú yfirlýsing hæstv. forsrh. segir auðvitað sitthvað um skoðun hans á því hvort ástæða sé til að samræma þessi frumvörp eða ekki.