Árni M. Mathiesen (andsvar):
Herra forseti. Skoðanir hv. þm. Sighvats Björgvinssonar á öryggis- og varnarmálum þjóðarinnar eru mér vel kunnar (HG: Og kærar.) og einnig skoðanir flokks hans, Alþfl. Hins vegar hafa skoðanir hinnar nýju stjórnmálahreyfingar, Samfylkingarinnar, verið nokkuð á reiki. Ég var að koma af stjórnmálafundi í einum af framhaldsskólum borgarinnar þar sem fulltrúar stjórnmálaflokkanna voru mættir. Frambjóðandi Samfylkingarinnar í Reykjavík var þar spurður um stefnu Samfylkingarinnar í öryggis- og varnarmálum og hann svaraði efnislega, eftir að hafa útskýrt að þarna væru tveir gamlir flokkar að koma saman sem hefðu haft ólíkar skoðanir á þessum málum, að Samfylkingin ætlaði að geyma sér að hafa skoðun á aðildinni að NATO þar til endurskoðun á öryggisstefnu NATO væri lokið. Hv. þm. Steingrímur J. Sigfússon var einnig staddur á fundinum og getur staðfest að ég fer efnislega rétt með.