Heilbrigðisráðherra (Ingibjörg Pálmadóttir):
Virðulegi forseti. Það er best að það komi hér skýrt fram að þessi slysaskráning á við öll slys á sjó og landi. Það er alveg ljóst og mikill undirbúningur hefur verið að slysaskráningu sjómanna. Af því hafa þeir haft mikinn heiður einmitt á Sjúkrahúsi Reykjavíkur þannig að það er allt undirbúið. Mér fannst ég ekki þurfa að telja upp alla en svo enginn misskilningur sé í málinu þá á þetta við öll slys bæði stór og smá á sjó og landi.
Þessi grunnur er einsdæmi í veröldinni og eins og ég sagði áðan er tölvunefnd núna með hann til umfjöllunar. Ég vona að við fáum jákvæðan stimpil á þennan grunn . Af því á það var minnst áðan hvort ég hefði ekki áhyggjur af því að þetta yrði stoppað, þá hefur verið mikil samstaða um þetta meðal allra heilbrigðisstétta og ég á ekki von á að neitt bakslag verði í því.