Kolbrún Halldórsdóttir:
Herra forseti. Ég þakka hæstv. menntmrh. fyrir þau orð að þeir muni halda þessari sérstöðu sinni. Það er góð yfirlýsing og þörf í þeirri umræðu sem nú á sér stað um stöðu þessara skóla.
Ég ítreka, herra forseti, að það að Verslunarskólinn skuli skyndilega vera orðinn starfsnámsskóli er alveg nýtt í stöðunni. Sérstaða hans hefur verið viðurkennd í gegnum það að hann fær nú skilgreiningu sem starfsnámsskóli, sem ekki var í umræðunni fyrir tíu dögum síðan. Sérstaða hans hefur því verið viðurkennd á viðunandi hátt. Það hefur verið fundin lausn á vandamálinu.
Það er ekki búið að finna lausnina fyrir hina tvo skólana en ég þakka hæstv. ráðherra fyrir að hann skuli segja það hér að sérstaða þeirra verði tryggð.