Sigríður A. Þórðardóttir (andsvar):
Herra forseti. Ekki er við hæstv. dómsmrh. að sakast þó fjölmiðlar sýni frekar áhuga á ferðum hennar og samstarfi við Bandaríkin en til Norðurlandanna.
Ég vil sérstaklega draga fram í þessa umræðu af því að nefndar voru vímuefnavarnir að Bandaríkin hafa lengi verið í forustu á sviði vímuefnavarna. Hugmyndir að því sem við höfum gert á Íslandi t.d. í áfengisvörnum og meðferðarúrræðum, höfum við m.a. sótt til Bandaríkjanna, til Hazelden-stofnunarinnar í Minnesota. Áður en við komum upp meðferðarstofnunum á Íslandi fóru Íslendingar til Bandaríkjanna í meðferð. Þessu megum við ekki gleyma. Bandaríkjamenn hafa staðið framarlega í slíkum málum og er margt hægt að læra af þeim.