Ögmundur Jónasson (andsvar):
Herra forseti. Mig langar til þess að beina spurningu til hæstv. ráðherra. Finnst hæstv. ráðherra eðlilegt að einn tiltekinn ráðherra hafi sjálfdæmi um hverjum hann selur ríkiseignir og á hvaða verði? Eru þetta eðlileg vinnubrögð? Mér finnst það ekki.
Á undanförnum árum hefur verið gagnrýnt hvernig staðið hefur verið að sölu ýmissa ríkiseigna og nefni ég þar Áburðarverksmiðjuna, SR-mjöl og önnur slík dæmi en mér sýnist hér gengið lengra í þá átt að fela ákvörðunarvaldið einum ráðherra, hverjum er selt og á hvaða verði. Nú heyrum við það úr munni hæstv. ráðherra að jafnvel standi til að selja á undirverði.