Guðjón A. Kristjánsson:
Herra forseti. Hér voru áðan afgreidd lög um áhafnir skipa. Nú er verið að afgreiða atvinnuréttindalög sem taka til fiskimanna. Verið er að auka réttindi úr 30 tonnum upp í 75 brúttótonn. Ég er algerlega andvígur þeirri breytingu, enda á hún ekki við nein efnisleg rök að styðjast. Ef staðan er skoðuð í flotanum, þá er breytingarreglan sem næst hefði komist eðlilegri breytingu 1,45 sem hefði þýtt 45 brúttótonna viðmiðun.