Forseti (Halldór Blöndal):
Ég býð hv. alþingismenn velkomna til þingstarfa á ný. Tilefni þinghalds nú á miðju sumri er, eins og öllum er kunnugt, kristnihátíð sem haldin er á morgun og sunnudag, 1. og 2. júlí, á Þingvöllum til að minnast þess að tíu aldir eru liðnar síðan kristinn siður var lögtekinn hér á landi.
Alþingi kemur saman til fundar að Lögbergi sunnudaginn 2. júlí í fimmta sinn síðan þingið var endurreist í Reykjavík. Gott samkomulag er milli þingflokka um fyrirkomulag þinghaldsins þessa sumardaga og hátíðardaga og þess er vænst að þingfundur hér í dag verði stuttur.