Utanríkisráðherra (Halldór Ásgrímsson) (andsvar):
Herra forseti. Það er alveg ljóst að farið er að lögum í þessu máli. Jafnvel þó að umrætt ákvæði til bráðabirgða hefði ekki komið inn í lögin á sínum tíma, þá býst ég við að niðurstaðan væri sú sama vegna þess að framkvæmdir við þessa virkjun voru hafnar og 83% af því kostnaðarmati sem þar lá fyrir hafði verið boðið út. Ég held því að enginn efist um lagagrundvöllinn í málinu.
Spurningin er hins vegar, eins og ég hef skilið það: Á þrátt fyrir það að fara út í þetta mat með allri þeirri forsögu sem er þarna fyrir hendi, m.a. öllum þeim kostnaði sem þarna hefur verið ráðist í og kominn er eitthvað yfir 3 milljarða? Þetta er mjög löng saga.
Það liggur alveg ljóst fyrir að hv. þm. segist vera á móti stóriðju og á móti þessari virkjun. Það eru sjónarmið sem ég virði og að mínu mati er miklu betra að umræðan gangi fyrst og fremst út á það. Málið snýst fyrst og fremst um það.